Министерот за надворешни работи и надворешна трговија, Тимчо Муцунски, попладнево оствари телефонски разговор со државниот министер за надворешни работи на Државата Катар, Султан бин Саад Ал Мураихи.
Во текот на разговорот, министерот Муцунски упати остра осуда за отворениот ирански напад насочен кон територијата на Катар, оценувајќи го чинот како сериозна повреда на принципите на меѓународното право, вклучително и грубо кршење на државниот суверенитет и територијалниот интегритет. Тој изрази цврста солидарност и целосна поддршка кон Катар, потврдувајќи дека Македонија ги поддржува сите мерки и одлуки преземени со цел заштита на безбедноста и стабилноста на државата.
Муцунски дополнително нагласи дека во услови на енормно зголемени регионални тензии, од суштинска важност се воздржаноста, одговорноста и засилениот дипломатски ангажман. Според него, само преку дијалог може да се спречи понатамошна ескалација и да се зачуваат мирот и стабилноста во целиот регион.
