Не е исклучена можноста првиот потпретседател на Владата на Северна Македонија и министер за животна средина, Изет Меџити, да се кандидира за градоначалник на општина Чаир на локалните избори во земјата закажани за 19 октомври.
Одговарајќи на новинарски прашања, Меџити рече дека не е исклучена можноста да биде кандидат за градоначалник на општината и да биде противкандидат на поранешниот министер за надворешни работи на Северна Македонија, Бујар Османи, кој јавно изјави дека размислува за кандидатура за истата општина.
„Засега ништо не е исклучено. Засега е само одлучено да се поддржи независниот кандидат за Струга, Менди Кура. Сѐ друго е на маса. Ќе бидете информирани истиот ден кога ќе донесеме одлука“, рече Меџити.
Конечните одлуки за кандидатите за претстојните локални избори ќе бидат објавени откако коалицијата „Влен“ ќе ги добие резултатите од неколку анкети од професионални агенции, кои се во тек.
„Како „Влен“, фокусирани сме на обезбедување на најдобрите, најквалитетните кандидати во секоја општина, што ќе ја потврди големата победа на „Влен“ на локалните избори, како и на претходните парламентарни избори“, рече Меџити.
Изет Меџити беше градоначалник на општина Чаир 12 години. Првиот мандат го доби во 2005 година, а потоа беше двапати реизбран. Во 2017 година, Меџити изјави дека нема да бара четврти мандат бидејќи сака општината да ја остави на помладите генерации во партијата.
Тогаш за нов градоначалник беше избран Висар Ганиу од ДУИ.
Висар Ганиу е моментално актуелен во македонската јавност по објавите за нелегална градба и секојдневните обвинувања за криминал во врска со неа од страна на градоначалничката на Скопје, Данела Арсовска.
